2. Khaw pakhata an kohhran pawh kha inkhawm an tlêm mai mai asin. Pahnih chiah an inkhawm a, pakhatin thu a sawi a, pakhatin a lo mutthlûksan.

3. Khaw pakhatah pawh khan nula rim tur an han vâng mai mai khawp a, uisathiam nen nula rîm tur an zawng ṭhin.

4. Lerh deuh hin piangthar pakhat pawh kha a’n piangthar over mai mai asin. A phone contact list an ensak a, an kohhran upa leh pastor number bak a awm lo.

5. Pa — Mama, i exam chu i ti ṭha em?
Naupang — Ti ṭha e. Ka pass hrim hrim.
Pa — (Tiang a la lawk a) ‘Ngati nge dawtsawi hi i hreh loh em em mai le…

6. Mi inthlahrung deuh pawh khan zu a in ve a. “Buaina ka siam ang a, a pawi viau ang em?” te a ti vel.

7. Nula pakhat pawh a biang a puar mai mai khawp a. A hnung lam aṭangin a beng thawi fuain an perh a, a biang a ri pawp.

8. Pro-fight lar lai khan lumehna dawrah a lu a mehtir dawn a. Lumettu chuan, “Engtiangin nge kan meh ang?” a tia, ani chuan, “Upper cut,” a lo ti vat!

7. ‘Min ngai lotu ngai hian ka lungleng nguar ang’ tiin tukverh bulah a lo ṭap hluam hluam.

8. Naupang pakhat exam zo haw chu a chhûngte’n a thiam leh thiam loh an zawt a. “Thiam lutuk. Ka chhâng zo hman lovang tih hlau va, question pawh ka en hman lo, ka chhâng par par,” zuk ti a!

9. Naupang pakhat pawh kha a nghal ve lutuk a. A pa hnenah, “Âpa, bike thlâwk thei min lo lei,” a ti sek a, a pa ning lutuk chuan vur sen a leisak ṭeuh ringawt.

10. Zirtirtu — Lehkha zir zel la, eng nge nih i tum?
Naupang — VDP.
Zirtirtu — Eng vangin?
Naupang — Mi ka vaw châk.

2. Ṭhiandun pawh kha an awm a. Pakhat zawk khan, “Ṭhianpa, chaw hi no. 4 ka chhum dawn a, kan kham ang em?” a tia, a ṭhianpa chuan, “E! Chaw ei chhuah i tum elo?” a lo ti hem mai.

3. Tleirawl pakhat chuan a ṭhiannu a lo hrilhru sar sar a…
“Thangkura zawngtë-in a star lutuk che!”

4. A bike kha a chhe âwm mai mai asin. A bulah vawksa kg 5 an dah a, “Khawi nge i duh zawk?” te an ti vel mai mai.

5. An ṭhenawmte inah khan TV-ah boxing khel lai an lo en ṭhap a, a en vang vang a. “Khi mite pahnih khi an inngeih lo ve hle mai,” zuk ti nulh a!

6. Inleng a nei ṭhing ṭhin mai mai! A pa’n a kamkhat hlak a.
“Mami, i inlengpa hi hau teh, veranda-a kan pangpar khawi zawng a zunkhum hlum zo vek tawh.”

7. Inneihna hautak —
“Lianpari hi i nupui tak ni turin i pawm em?”
“Nang i pawm em?”
“Pawm nang. Inneihtirtu tur cheu ka nia, ka pawm leh pawm lohvin awmzia a nei hleinem. Nang a pasal tur hian i pawm em ka tia lawm.”
“Pawm bik teuh lo mai. Nang pawhin i pawm duh loh chu engah nge mi hnawn luih ṭalh i tum?”

8. Jail tângho hi ‘eng nge i châk ber’ ti ila, ‘a changtupa lo kal se, min lo chhanchhuak vek se’ an ti deuh zel.

9. A hmelchhe âwm mai mai asin. VC-ah a in-candidate ve a, a fapa chuan, “Ka pa chu bawng a nia, a symbol chu Zothansiama,” te a ti vel.

10. Kan ṭhianpa sermon pawh khan a duh aiin a key a la sang a, thu sawi thei mang lo khawpin a khuh tluan zak.

2. Pa pakhat pawh hi a ṭawngṭai khât awm asin. “Kei chu Pathian hian enkawl nuam min ti ngawt ang,” a ti a. “Eng vang chuan maw?” an ti a, “A, engmah hi ka dil ve ngai si lo va,” zuk ti a.

3. Khaini bura milem chuang leh Raja chap khaini kawma milem chuang te hi nute unau an ti.

4. Khaw pakhatah pawh khan mitthi kha kuang nawrna angah khan an nawr a, kawng chhukah amahin a’n lirthla mai chu, kuang nawrtute an buai teh a nia aw… An ûm hut hut mai mawle!

5. Kohhran upa pakhat pawh a ho ve thei mai mai. Nilai zan inkhawmah mi a phuar ve a, “Kan nau Lalduha hi inngaihna suala a lo tlûk leh ṭhin avangin…” te a ti vel.

6. Zirtirtu — Lala, i len hunah eng nge nih i tum?
Naupang — Thlawhna ka khalh ang a, a chhiat hunah JCB ka khalh ang.

7. Zirtirtu — Sai hi eng atan nge an hman ṭhin?
Naupang — Sakawr atan.

8. Non-Mizo pakhat kha khawhar inah an hruai a, hla an han la nawn zel kha a hrethiam lo deuh ni tur a ni, a bula mi hnenah khan, “Ṭhianpa, a phuahtuin a phuah nawn leh zel mi?” tiin a zawt tawp.

9. Tlangval pakhat pawh khan damdawi zuar a star a, a hrisel ṭul bawk si, a tih vak ngaihna hre lo chuan Vitamin ‘C’ a lei tlut tlut ringawt.

10. Tlangval pakhat pawh kha Valentines Day zan khan inchei tâwkin chhas hmu turin a chhuak a, ral aṭangin a bialnu a han bye bye a, a haw leh nal nal.

2. Nu pakhat mood fuh lo pawh kha a fuh lo mai mai asin. Khawlaiah a fapa a kai a, a fapa chuan, “Ânu, i duhna naah kal ang aw…” a tia, nu chuan, “Ninawm, min bia min be suh,” tih pahin a beng pawp!

3. A phakar mai mai. “Ka pa, pawisa min pe la, ka nu mutpui ṭhin ka hrilh ang che,” a tia, a pa chuan a mamawh aia tam a pe a, “Tu nge ni?” a ti zui a. A fapa chuan tlanchhuah pahin — “Nangmaaaah!!!”

4. An fapa kha a ṭangkai lo ve âwm mai mai asin. “Kan fapa hi chu aw… Arpui tui laia thleng duh awm se ka ti ngawt mai,” a ti vawng vawng mai ‘ni.

5. Parawl pakhat pawh kha, a chaw chhum chuan tlai lama mi tur a chhum nghal a, a laiah a hawlh phel phawk a. A chaw ei a lo tui deuh va, tlai lama mi tur a dah hran kha inthlahrung deuhin a pûk vel duk duk.

6. An awmpui nula lak thar kha a zâm lo ve khawp mai. “Artui kha lo kang rawh,” an tia, a chhûngmu zawng a lo hîp fai vek.

7. A’n tawi mai mai. A khup chen tui a dai a, a pil daih.

8. Football an khel a, an lamah goal a lut tlut tlut mai a, captain pawhin tihngaihna a hre lo va, a teammate-te hnenah, “Thai tlut tlut mai ang u aw…” a ti thlawt!

9. Handyman pakhat pawh kha a senior tawh lutuk a, driver 5 a zuihlum tawh.

10. “Ka pi, i zûnah maw ka lo uai a? Hraite i chawnpuar ka ni nem le…” A hre sual ve khawp mai!

2. Zurui pakhat pawh khan nêm muang pâwr tâwkin, “Min cho in awm em? A ngam chuan ka nghawng hi rawn chhawk hmawk se ka harh sawt ang,” a tia, an kawmthlangpain, “Keiman ka ngam,” a tia, zuruia chuan, “Ka ti fiam a…” a ti nasa mai.

3. Zirtirtu — Thatchhia leh taima belhin eng nge chhuak ang?
Mawia — Thatchhia.
Zirtirtu — Eng vangin?
Mawia — Minus leh plus belh chu minus a chhuak i tih kha…

4. Tlangval pakhat pawh khan maruti ṭâwng lam a nei a, a sas kha a lênchhuahpui ve a. An tlan laklawh laiin motor a thi thut a, running a ngai a. Midang han pun mai tur an hre si lo va, a bialnuin amah chauhvin a nawr ṭuih ṭuih.

5. Ram dangah missionary-in a awm a, zirtirtu-ah a ṭang a. Mizo ṭawngin, “Tunge Mizo ṭawng thiam lo?” a tia, tumah ban an phar lo; a chhan chu tuman Mizo ṭawng an thiam lo!

6. Tlangval pakhat pawh khan nipui laiin a khawlum kawr turan leisak a, a lo chep kaw thluah mai a. A chhungte’n an hau va, ani chuan, “A lum lutuk a, ventilation ka siam alawm,” a ti ve tlat.

7. Naupang pakhat pawh hian patling hnenah, “Ka pu, zun in in nei em?” a tia, patling chuan, “Nei e,” a ti a. Naupang chuan, “Tlém ka lo ê..” a tia, chupa chuan a ngei raps mawle.

8. An vawk in chung an sa hniam lutuk a, an vawkpa pawh bawkvakin a kal hrut hrut. An ar in chhuat lah an lo ti derthawng leh lutuk bawk sia, ar te chu dingdihlip hlirin dimtêin an kal ṭhem ṭhem zel.

9. Vawi khat chu Silchar bazarah kel pakhat hi motor-in a su a, tu’n ‘ka ui ka ar’ an ti lo va, a tawpah vai putar pakhat hi a lo kal a. “Mera bakra,” a tia, a la daih.

10. MLA inthlan hnuhnung berah khan Independent-in a ding a, a tling zo lo va. A hnuah VC-ah Independent bawka dingin a tling zo lo leh a. Unit inthlannaah pawh a la vanduai cheu mai a, pangpar committee thleng pawha a ring a rawlh zel hnuah, nikum krismas dawn khan fatu leader-ah an ruat.

2. Chhura khan Nahaia kha over a ti thei raps.

3. Concert-naah a zai ve a, a sa sual chiang ve mai mai. Ring leh ṭêng tawkin, “Val ngai lo zama ṭang ta che…” a ti liah liah.

4. Chaw an eikhawmnaah a ṭawngṭai a. A ṭawngṭai zo dawn tihah pawn lam aṭangin an rawn ko thut a, a eih tum inring hman lo chuan ring lutuk maiin, “Amen!” a’n ti mai chuh!

5. Dog show-ah khan a uipa kha a hruai ve a, “I duh duh danin awm rawh,” a tia, pakhatna a nihpui lel.

6. Dog show-ah a uinu hur a’n hruai mai chuh! An buai mai mai asin aw…

7. Exam zawhna — ‘Laikhum zala ka dâwn pawhin, a mak e; hrilhin sawi har ka ti’ tia Vankhama’n a sawi hi eng a tihna nge han hrilhfìah teh.
Chhanna — A phuahtu Vankhama meuh pawhin sawi har a tih chu engtin nge keini zirlai ve maite’n kan hrilhfiah tehlul ang le…

8. Sikul naupang pakhat pawl hnih zirlai pawh kha an zirtirtuin bawng essay ziak turin a ti a, ‘Bawng chu ṭawngṭai lovin a mu ṭhin’ tiin zu han ziah mauh va! A dik ve tho sia.

9. Nupui a nei thar ve a, a tukah sub-centre-ah a inbuk vel mawle.

10. Nula leh tlangval inngaizawng pawh khan chance an nei ve a. Tlangval khan a bialnu bulah, “Nang hi chu ka tana khuanu bel ruat ngei i lo ni,” a tia, nula chuan inlazei fahran, “Nang pawh ka tana a cooker ruat i ni ve tho alawm,” a lo ti nghal zat.

2. Tlangval të pakhat pawh kha nula a rîm dawnin an uipa chungah a chuang ṭhin.

3. Tlangval pakhat pawh khan kel a pu a, a kel put khan bê êl êl chungin a khabe-ah a kick a, a ṭhianṭe’n an nuih a. “In hlimpui viau ami?” a ti tûm hmak!

4. Tlangval pakhat Leather Jacket lei thar pawh kha, meilum a aipui chuan a khup thlengin a fual thla hnuk zel a, khaw vawtin a han hmet leh a, a zakhnuaiah a tawm chho leh vek zel.

5. Tlangval pakhat camp chhuak pawh, “I piangthar em?” tiin an zawt a, ani chuan, “Hre lo. An rawn puang mai ang,” a lo ti sam ët.

6. Tlangval pakhat pawh kha a inbual fai lo mai mai asin. A inbual zo chu towel-in a inhru a, a khawk ta mai a. Fan-in a inchhêm rotir ṭhak.

7. Nula in kawngka bianga inchhuih luh khut khut pahin, “E khai! Khanchhuka ka’n inchhuih palh chu le!” a tia, nula chuan, “Kha te chu khanchhuk a nih loh kha…” a lo tia. Tlangval chuan, “Keini sawi ve te chu i awih leh tak tak chuang nang,” a’n ti leh zaih ah!

8. Tlangval pakhat pawh khan Sunday School inkhawmah Secondhand kamis a ha a, a nghawng hmawra lazai chu a pawt a pawt a, a kawr nghwng a tla tawp.

9. Tlangval pakhat pawh kha a bialnu chhungte’n an duh lo lutuk a, an inru a. An thinrim chuan an inneihnaah a nupui chhungte an sawm duh lo vel.

10. Chapchar Kût mister thlannaah a tel ve a, Mizo incheina nen thuam famkimin a rawn pên chhuak a. A kawr a phelh a, a’n intisek mai chuh, a tling lo chiang teh asin aw…

2. Tualte Vanglaia zawngṭah kual ber pawh kha a ziattupa a inbingbilet tawp tawp.

3. Tualte Vanglaia nula pakhat pawh khan Aizawl a ngeih mai mai asin. Lânga a zin pawhin a êng haw váwk zel.

4. “Tuaiho hi an putar hunah an nuihzatthlak âwm,” a ti a, amahin a lo nui khiah khiah.

5. Tu emaw i bula a ṭhuta earphone-a hla a ngaihthlaka a maimitchhina a hmui a chîp bawk chuan, i tan a hnarkua chiah a hawng tih hria ang che.

6. An pasal te engtiat nge tih hre hmasa lova minu ngaihzawn hi a inchhirawm duh hle, an ti!

7. Treasury Square aṭanga RV an thlen meuh cuan bike hnunga a phurh nu hmui chung lam chu a hahni-ah a lo bet vek. Tlan chak awm fer fer.

8. TMB kha an modi’ a, tawlailir-ah an chhuah.

9. Tlangval — I va nui mawi tak, rose kuhmum rawn par chhuak lai i ang. Kei eng nge ka an?
Nula — Sakawr nui i ang.
Tlangval a lâwm lo raps!

10. Tlangval pakhat pawh kha a’n mâwl ve mai mai. A ṭhianpa’n, “Mi’n min star ve ringawt a nia,” a tia, tlangval chuan thinrim hmel deuh hian, “Tunge sawi teh. Keiman ka’n hnek ang e,” a ti nghal pung pung.

2. “Ka pi, ‘tinge uipa hi an zun hian an ke lehlam chauh an khai a”
“Aw… Pahniha an khai te chuan an tlu ang asin.”

3. Lengpui airport bulah thlawhna part a zu zuar ve rawk a, a hlawk nêp phian asin!

4. Vawktë a zuar a, pathum cheng 7000 a tia, cheng 5000-in an dil a, ani chuan, “Cheng 5000-a pek cheu ai chuan vawhlum phiar ila ka duh zawk,” a ti hem mai. A phal lo ve mai mai khawp mai.

5. NLUP-ah Cheng 2000 a dawng ve a, an nu hnenah, “Kha, ka tih rëng kha, dinchhuah hun kan la nei ang ka tih kha,” a ti vei ham ham.

6. Tlangval pakhat lock up-a tâng pawh kha a chhuah dawnin hnim an sàmtir a, a ning lutuk chuan, “A bak hi chu ka rawn tàn leh hunah ka sàm chhunzawm mai ang, ka rei chuang lovang,” te a ti vel.

7. A zei lo ve mai mai asin khawlaiah a chhas kha a hmu ve a, kuk pawp pahin, “Khawnge i kal dawn a? Ka kuk mai tur che asin,” te a ti vel.

8. Tlangval pakhat pawh hian a bialnu hnenah, “Camp ka lut a, ka insiam ṭha tawh asin,” a ti a, a bialnu chuan, “A hma zawng khan i lo insiam chhe ṭhin elo?” a lo ti khauh.

9. Ṭhian pahnih rui deuh pawh kha bike-in an tlu a, a hnung zawka mi chuan, “Ṭhianpa, a kan tlu em ni?” tih pahin a darah a bêng thak thak a, ka ring che a nia aw…” a la ti zui a!

10. Wheel chair a lei ve a, test drive te a nei vel.