Valentine’s Day Pual — Taksa pêng ṭhenkhatte pawimawhna

Valentines Day a ni a, ṭhalaite tan chuan ni pawimawh tak a ni. Chutih rualin, Siamtu’n duh taka a siam, kan taksa pêng hrang hrante hian pawimawhna leh ṭangkaina tam tak an nei ṭheuh va, a mihring azirin kan hmanna pawh a tamin a tlem ang a, kan hman ṭangkai thiamin kan hmang sual thei a ni. Chutih mek laiin, a romantic thei ang berin — mihring taksa peng hrang hrangte ṭangkaina i’n thlir zuai zuai teh ang. Kan vanneihzia leh Siamtu themthiamzia kan hriatchian phah deuh mahna!

1. LU — A pawimawh tawp! Sam ṭona a ni a, thluak bur a ni bawk. Thluak chu engtin nge ka sas ka tihlungawi theih ang, engtin nge ka kherhthluk thei ang, engtin nge awm ila min duh deuh deuh theih ang, tih zawng zawng ngaihtuahtu khâwl a ni a, chuvangin lu hi love & romantic-ah chuan a pawimawh tawpkhawk.

Chumai a la ni lo! Sam ṭona hmun a la ni lehzel hian a pawimawhna a tizual ngawih ngawih. Sam hi eng nge hmangaihna kawngah a ṭangkaina, i ti maithei. Lengzem hla phuahtute tan hlarua ṭha lutuk a ni! Hla-a sam chungchang awm zawng zawng hi, sam awm lo ta se a awm lo vek dawn tihna a ni a, chuvangin sam hi literature tihausatu leh hlaphuahtute puitu ṭha tak a ni.

Entirna han pe mai mai ila. Hla pakhat, ‘Bahsam lêngin a nui hiau ve..’ tihte hi sam awm lo sela chuan, ‘Hnapkhir langin a nui hiau ve..’ an ti maithei asin. A nih loh pawhin hetiang hlate hi a awm lo tawp ang. Chuvangin sam awmna, lu hi a pawimawh tawp.

2. MIT — Hmangaihna leh mawina hian mit a tilerh hneh teh e.. Mipa tan, hmeichhe hmelṭha tluka hmuhnawm an awm thei dawn em ni? Hmeichhe tan lah chuti tho. Hmeichhe mithmul er deuh tãrh, meng mawi zet maiina min han melh deuh ralh hi chu — awi awi awi..! Ka thi!

Mit siai hian thil a tithei ngawt mai. I star rûk deuh kha a hmuhah han siai zeuh la, a lai(h) loh tâkah! Chu chuan thil tam tak a hring nghal ang. Inngaihzawnna kawngah phei chuan bulṭantu pawimawh a tling thei. Tu emawin a hmangaih thu che a sawia dawt a nih leh nih loh i hriat duh chuan a mit en vat rawh. Mitah hian dawt sawi leh sawi loh chu a lang chiang khawp mai.

Hmangaih hmel taka duhtakte’n min han melh zeuh tawh hi chuan kan nuam veng veng ṭhin. Meng mawi chuan zûn an ngah deuh nge nge. Chuvangin menmawi te hi zir a ṭha a, intih-menmawi erawh a ngeiawm uchuak.

Thu leh hla-ah a pawimawh tawp. Mit hi awm lo ta se a va buaithlak em! Mizo ṭawng thumal tam tak a bo vang. Chu’ng zingah chuan ‘siai’ hi a langsar zual a ni awm e. Mit awm lo ta se hlaphuahtute pawh an buai awm mang e. ‘Hmangaih mengmawitê’ tihte hi ‘Hmangaih beng mawitê’ an tih a ngai ang a, beng mawi chu tuman an lo chu e kha e vak awm si lo va! A hlaphuahtu chu a hlawhchham chiang ngawt ang.

3. HMUI — Hmangaihna kawngah hian hmui hi a va han pawimawh chiangkuang tak em! Taksa peng dang zingah infawh vawng vawng nan hmui tluk hi a awm dawn em ni?! Hmui tluka infawhna rem hi Siamtu’n mihringte tan a lo siam lo reng reng.

Hmui hi hmangaihna lantirna atan a pawimawh khawp mai. Nula leh tlangval inhmangaihnaah hian hman rim a hlawh hle a; hmui hian hmui vek hi a pan chat ṭhin. Hmui leh hmui a insîk tawh chuan mit pawh a meng phal tawh lo va, taksa chhûng lamah kan ṭêk chhek chhek tawh ṭhin a ni. A ṭêkte lah chu ṭêk rau rauah ṭêk nuam chiai chiai ang chi a lo ni leh kher a!

Infawh vawng vawng lai hian ‘hmui hi lo awm ta lo sela..’ ti zâwngin i ngaihtuah ngai em? Chutah chuan Siamtu ropuina hmu thei ang che. Siamtu hian a duhsak lutuk che; i duhtak nena sex tel lova nuam veng venga i awm theihna tur a ngaihtuah sak che a, chu pawh lei a ngai lo. Zir chawp em em pawh a ngai chuang lo. I lo ṭhanlen rualin i thiam chho ve tawp lehnghal.

Hmui hi awm lo sela chuan, hmuihnawih siamtu tam takte sum lâkluh a titlem ang a, hmuirêp damdawi siamchhuaktute lah chuan hmingṭhatna an hlawh nêp phah ang. Tin, thuziaktute hian han seprawtui tur an neih tlem phah bawk ang. Khai mah aw.. ‘A hmui sen vàm ham’ tih turah ‘A ha sen vàm ham’ an tih a ngai ang a, a sawi tum kha a tiho zo vek ang!

Le, i hmui kha liak huh la, hnawih mawm la, tlém han hnawih sen la, a îtawm thei ang bera i hriatin dah la, i duhtak chu han fâwp vawng vawng teh le. Sual a ni lo a nia.

4. MAWNGTAM: Mawngtam mawi hi a pawimawh ngawt mai. Mawi takin a inṭhen phawk a, lian bik leh të bik lam hi a awm lo reng reng. Hmeichhiaah chuan, a poh deuh alh a, an han kal ṭãwlh ṭãwlh hi chu a hmuhnawm ve chiang. Mipa mit hi a la ngawih ngawih a ni. Chutih rualin mipa mawngbawr lian ṭha leh lawh hi chuan hmeichhe mit a la mawh a nia. Mahse, a tihdan bik riau an thiam chuan ‘Mawngtam Mawi’ a nih ve theih a ni.

Shakira pawh a mawngtam a sawi (shake) thiam avangin a zaithiamna piah lamah a hmingthanpui a, model tam tak pawhin mawngtam nalh leh lian ṭha an nihna bakah an show thiam avangin sum tam tak an lakpui ṭeuh ṭeuh mai a ni.

Eng anga mawng mawi leh duhawm tawpthang nei mah la, ṭul lova mi zinga tarlan vak vak chu pawi tak a ni. A mawina kha a tawk em em a, eizawnna atana hman tum i nih ngawt loh chuan a awm awmin awmtir la, thlirtute’n an duh ang angin an lo sawi zui mai dawn a ni.

Tichuan le..! Mipa tam tak chuan khal kan tehna chu an mawngtamah a ni fo. Sexy kan tihna chhan pawh an mawng poh mawi leh nalh em vang a ni bawk. Chuvangin hmeichhe tan chuan a hmangaih leh duhtakte hîp nan a pawimawh em em a, a theih ang angin i sawizawi ṭhin tur a ni. Kekawrte erawh lang lo hram ṭhin rawh se; mawng mawina i tibo vek.